ရန်ကုန်၊ ၂၃.၃.၂၀၁၉
    လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စု ဝန်ကြီး ဒေါက်တာဝင်းမြတ်အေး၊ ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ် ဦးဖြိုးမင်းသိန်းနှင့် တာဝန်ရှိသူများသည် ရန်ကုန်တိုင်းဒေသကြီးအတွင်းရှိ လူငယ်ရေးရာ ကော်မတီအဖွဲ့ဝင်များ၊  အဖွဲ့အစည်းအသီးသီးက လူငယ်များနှင့်တွေ့ဆုံ၍ လူငယ်ရေးရာမူဝါဒဆိုင်ရာ ကိစ္စများကို ရန်ကုန်တိုင်းဒေသကြီး အစိုးရအဖွဲ့ အစည်းအဝေးခန်းမတွင် တွေ့ဆုံဆွေးနွေးခဲ့ကြပါသည်။
    ပြည်ထောင်စုဝန်ကြီးနှင့်အဖွဲ့သည် ရန်ကုန်တိုင်းဒေသကြီးအစိုးရအဖွဲ့ အစည်းအဝေး ခန်းမ၌ ရန်ကုန်တိုင်းဒေသကြီးအတွင်းရှိ လူငယ်ရေးရာကော်မတီအဖွဲ့များ၊  အဖွဲ့အစည်း အသီးသီးက လူငယ်များနှင့်တွေ့ဆုံရာ၌ မိမိတို့ဝန်ကြီးဌာနအနေဖြင့်  လူတစ်ဦးချင်းစီ၏ ရပ်တည်မှုနှင့်ဖွံ့ဖြိုးတိုးတက်မှုအတွက် လူမှုကာကွယ်စောင့်ရှောက်ရေးလုပ်ငန်းတာဝန်များကို ကျေပွန်အောင် ကြိုးပမ်းဆောင်ရွက်လျက်ရှိကြောင်း၊ ထို့အတွက် လိုအပ်သော မူဝါဒများ၊ မဟာဗျူဟာများ၊ လုပ်ငန်းစဉ်များ ချမှတ်ရပါကြောင်း၊ လူငယ်များ၏ အခွင့်အရေးများကို ဖော်ဆောင်ပေးရန်နှင့် ဖွံ့ဖြိုးတိုးတက်မှုများအတွက် ဆောင်ရွက်ပေးရန် လိုအပ်ပါကြောင်း၊ မြန်မာနိုင်ငံသည် လူငယ်ရေးရာမူဝါဒ မရှိသေးသည့် ကမ္ဘာ့နိုင်ငံ (၃၁) နိုင်ငံထဲတွင် ပါဝင်နေသော ကြောင့် အစိုးရသစ်လက်ထက်တွင် လူငယ်မူဝါဒကို ရေးဆွဲခဲ့ပါကြောင်း၊ ဤမူဝါဒသည် လူငယ်များကိုယ်တိုင် ဦးဆောင်ရေးဆွဲခဲ့ခြင်းဖြစ်ပြီး ပြီးခဲ့သော ကာလများ၏ သင်ခန်းစာ ယူစရာများ၊ လူငယ်များ၏ အတွေးသစ်အမြင်သစ်များဖြင့် ရေးဆွဲထားခြင်းဖြစ်ကြောင်း၊ လူငယ်များအတွက် ကောင်းမွန်သော အပြောင်းအလဲကို ဖော်ဆောင်ပေးရန် ဆောင်ရွက် ထားခြင်းဖြစ်၍ ပြုပြင်ပြောင်းလဲရန် လိုအပ်လာသောအချိန်တွင် ပြန်လည်ပြင်ဆင်နိုင်အောင်လည်း ထည့်သွင်းရေးဆွဲထားပါကြောင်း၊ လူငယ်ရေးရာမူဝါဒထဲတွင် လူငယ်များအတွက် အရေးကြီး သည့် ကဏ္ဍ(၁၆) ရပ်ပါဝင်ပါကြောင်း၊ ထိုကဏ္ဍများထဲတွင် လူငယ်နှင့်အလုပ်အကိုင်အခွင့်အလမ်း၊ လူငယ်နှင့်ငြိမ်းချမ်းရေး၊ လူငယ်နှင့်မူးယစ်ဆေးဝါး စသည်ဖြင့် ဦးစားပေးရမည့် ကဏ္ဍများလည်း ရှိပါကြောင်း၊   လူငယ်များသည် အနာဂတ်နိုင်ငံဖွံ့ဖြိုးတိုးတက်ရေးအတွက် လက်ဆင့်ကမ်း တာဝန်ယူ ဆောင်ရွက်ကြရမှာဖြစ်သောကြောင့် စွမ်းရည်ပြည့်ဝသော လူသားအရင်းအမြစ်များ ပေါ်ပေါက်လာရန် လိုအပ်ပါကြောင်း၊ ထို့အတွက် မဟာဗျူဟာအဆင့်ဆင့်ရေးဆွဲခဲ့ပြီး ညှိနှိုင်း ဆွေးနွေးအတည်ပြုနိုင်ရန် ဆောင်ရွက်လျက်ရှိကြောင်း၊ လက်တွေ့အကောင်အထည်ဖော်ရန် လုပ်ငန်းစဉ်များရေးဆွဲရာတွင် တိုင်းဒေသကြီး/ ပြည်နယ်အလိုက် စနစ်တကျ ညှိနှိုင်းဆွေးနွေး ကြရမှာဖြစ်ပါကြောင်း၊ လူငယ်များ၏ အခန်းကဏ္ဍကို အစိုးရအနေဖြင့် အလေးထားပါကြောင်း၊ လူငယ်များ၏ ဆောင်ရွက်ချက်များကို မိဘများ၊ မိသားစုများနှင့် သက်ဆိုင်ရာ တာဝန်ရှိသူများ ကလည်း  အားပေးပါဝင်ရန်လိုအပ်ပါကြောင်း၊ လူငယ်ရေးရာမူဝါဒကို အခြေခံ၍ မဟာဗျူဟာ ချမှတ်ရေးဆွဲပြီး လုပ်ငန်းစဉ်များအကောင်ထည်ဖော်ရာတွင် ဝန်ကြီးဌာနအလိုက် ချမှတ်ထားပြီး ဖြစ်သော လူငယ်များနှင့်ပတ်သက်သည့် လုပ်ငန်းစဉ်များ၊ ရန်ကုန်တိုင်းဒေသကြီးက ချမှတ် ဆောင်ရွက်လျက်ရှိသော လုပ်ငန်းစဉ်များနှင့် ချိတ်ဆက်ဆောင်ရွက်ရန် အရေးကြီးကြောင်း၊ လူငယ့်ရေးရာမူဝါဒသည် လူငယ်များအားလုံး အခွင့်အရေးများကို အပြည့်အဝရရှိစေရန်နှင့် သာတူညီမျှခံစားရရှိနိုင်ရန် ထည့်သွင်းရေးဆွဲထားခြင်း ဖြစ်သည့်အတွက် အကောင်အထည်ဖော် ရာတွင် လူငယ်များက ကဏ္ဍအသီးသီးတွင် တာဝန်ယူ၍ ဆောင်ရွက်သွားကြရန်ဖြစ်ပါကြောင်း၊ လူငယ်များသည် မိမိတို့ကိုယ်တိုင် အရည်အချင်းပြည့်ဝအောင် ကြိုးစားဆောင်ရွက်ကြပြီး ပြည်သူ့အစိုးရ၏ ဒီမိုကရေစီစနစ် အမြစ်တွယ်အောင် ရုန်းကန်ကြိုးစားမှုများတွင် အတိတ်၏ အမှားများကို သင်ခန်းစာရယူလျက် အတွေးသစ်၊ အမြင်သစ်များဖြင့် အားလုံးတက်ညီလက်ညီ ပူးပေါင်းဆောင်ရွက်ကြခြင်းဖြင့် အနာဂတ်လူငယ်များအတွက် အမွေကောင်းများ လက်ဆင့်ကမ်း ပေးနိုင်ကြစေလိုကြောင်း ပြောကြားခဲ့ပါသည်။
    ထို့နောက် ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ် ဦးဖြိုးမင်းသိန်းက နှုတ်ခွန်းဆက် အမှာစကားပြောကြားရာတွင် လူငယ်များသည် စိန်ခေါ်မှုများစွာကို ရင်ဆိုင်နေကြရကြောင်း၊ လူငယ်များ၏ စွမ်းဆောင်ရည်များကို လမ်းဖွင့် မြှင့်တင်ပေးရန်လိုပါကြောင်း၊ လူငယ်များသည် တီထွင်ကြံဆလိုစိတ် ရှိကြပါကြောင်း၊ ထို့အတွက် ရန်ကုန်မြို့တွင် Innovation Center တစ်ခု ဖွင့်လှစ်ပေးထားပါကြောင်း၊ လူငယ်မူဝါဒကိုအခြေခံ၍ မဟာဗျူဟာ၊ လုပ်ငန်းစဉ်များ ချမှတ် အကောင်အထည်ဖော်ရာတွင် လူငယ်များက အဓိကစွမ်းဆောင်ကြရမှာဖြစ်ပြီး ဆောင်ရွက် လိုသည့် လူငယ်အကျိုးပြုလုပ်ငန်းများကို သက်ဆိုင်ရာပညာရှင်များ၊ လုပ်ငန်းရှင်များ၊ အဖွဲ့အစည်း များနှင့် အလွယ်တကူ ချိတ်ဆက်ဆောင်ရွက်နိုင်ရန် ဖြစ်ကြောင်း၊ မိမိအနေဖြင့် လူငယ့်ရေးရာ ကော်မတီဝင်များ၊ ရန်ကုန်တိုင်းအတွင်းရှိ လူငယ်များနှင့် တွေ့ဆုံ၍ လိုအပ်ချက်များကို အသေးစိတ်ညှိနှိုင်းပြီး ဖြည့်ဆည်းဆောင်ရွက်ပေးသွားမည်ဖြစ်ကြောင်း ပြောကြားခဲ့ပါသည်။
    ဆက်လက်၍ တက်ရောက်လာကြသော အဖွဲ့အစည်းအသီးသီးက လူငယ်များ၊ တိုင်းဒေသကြီး လူငယ်ရေးရာကော်မတီအဖွဲ့ဝင်များက လူငယ်များ၏ အလုပ်အကိုင်များ ဖော်ဆောင်ပေးနိုင်ရေး ကိစ္စရပ်များ၊ လူငယ်နှင့် စီးပွားရေးကဏ္ဍများ၊ ကလေးအလုပ်သမား ကိစ္စရပ်များ၊ စိန်ခေါ်မှုများ၊ မဟာဗျူဟာရေးဆွဲရာတွင် ပါဝင်ဆွေးနွေးနိုင်ရန် တိုင်းဒေသကြီး လူငယ်ရေးရာကော်မတီအဖွဲ့ဝင်များနှင့် ဆက်သွယ်ဆွေးနွေးရမည့်ကိစ္စရပ်များနှင့် လူငယ်မူဝါဒကို ကျယ်ကျယ်ပြန့်ပြန့် သိရှိနိုင်ရေးတို့ကို ဆွေးနွေးတင်ပြကြရာ ပြည်ထောင်စုဝန်ကြီး၊ ရန်ကုန်တိုင်း ဒေသကြီးဝန်ကြီးချုပ်နှင့် တာဝန်ရှိသူများက ပြန်လည်ညှိနှိုင်း ဆွေးနွေးခဲ့ကြပါသည်။ ထို့နောက် ပြည်ထောင်စုဝန်ကြီးနှင့်အဖွဲ့သည် တက်ရောက်လာကြသော လူငယ်များနှင့် စုပေါင်း မှတ်တမ်း ဓါတ်ပုံ ရိုက်ကူးခဲ့ကြကြောင်း သတင်းရရှိပါသည်။