စစ်တွေ ၊ ၁၆.၁၁.၂၀၁၈

လူဝင်မှုကြီးကြပ်နှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးဦးသိန်းဆွေ၊ လူမှုဝန်ထမ်း၊ ကယ်ဆယ် ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး၊ ရခိုင်ပြည်နယ် ၀န်ကြီးချုပ် ဦးညီပု၊ ပြန်လည်လက်ခံရေး၊ ပြန်လည်နေရာချထားရေးလုပ်ငန်း ကော်မတီဥက္ကဌများဖြစ်ကြသော ဒုတိယ၀န်ကြီးများ၊ ရခိုင်ပြည်နယ်အစိုးရအဖွဲ့ဝင်ဝန်ကြီးများနှင့် ဌာနဆိုင်ရာတာဝန်ရှိသူများသည် ယနေ့ နံနက် ၈ နာရီခွဲက စစ်တွေမြို့မှ လှဖိုးခေါင် ပြန်လည်လက်ခံရေးယာယီကြားစခန်းသို့ နေရပ်စွန့်ခွာသူများ  ပြန်လည်လက်ခံ ရေးနှင့် ပြန်လည်နေရာချထားရေးအတွက် အသင့်ြ့ပင်ဆင်ဆောင်ရွက်မှုအခြေအနေများအား သွားရောက် ကြည့်ရှုစစ်ဆေးကြသည်။

ပြည်ထောင်စု ၀န်ကြီးများနှင့်အဖွဲ့သည် လှဖိုးခေါင် ယာယီကြားစခန်းသို့ နေရပ်စွန့်ခွာသူများ ပြန်လည် ၀င်ရောက် လာပါက အသင့်ကြိုတင်ပြင်ဆင်ဆောင်ရွက်ထားရှိမှုများအား ကြည့်ရှုစစ်ဆေးကြရာ ပြန်လည် လက်ခံမည့်နေရာ၊ ဆောင်ရွက်သွားမည့် လုပ်ငန်းစဉ်များ၊ ပြန်လည်ဝင်ရောက်လာသူများ ယာယီတည်းခို နေထိုင်ရန် အဆောက်အအုံများဆောက်လုပ်ထားရှိမှု၊ ကျန်းမာရေးစောင့်ရှောက်မှုပေးရန်နှင့် သန့်ရှင်းသော သောက်သုံး ရေရရှိရေး၊ လျှပ်စစ်မီးရရှိရေး၊ ယင်လုံအိမ်သာ အလုံအလောက်ရှိအောင် ဆောင်ရွက်ထားမှု၊ မီးဘေး လုံခြုံရေးဆောင်ရွက်ထားရှိမှု၊ စခန်းပတ်ဝန်းကျင် သန့်ရှင်းရေးအတွက် ဆောင်ရွက်နေမှု၊ ထပ်မံဆောင်ရွက်ပေးရမည့်လုပ်ငန်းများကို စခန်းတာဝန်ခံက ရှင်းလင်းတင်ပြသည်။

ပြည်ထောင်စုဝန်ကြီးများနှင့်အဖွဲ့သည် ပြန်လည် လက်ခံရေးလုပ်ငန်းစဉ်များ ဆောင်ရွက်ရန် ပြင်ဆင်ထားမှု အခြေအနေများ ကိုလည်းကောင်း၊ တရုတ်ပြည်သူ့သမ္မတနိုင်ငံမှ လှူဒါန်းထားသော အလွယ်တကူတပ်ဆင် ရွှေ့ပြောင်းနိုင်သည့် လူနေအိမ်(Assemble Board Houses)များ တပ်ဆင်နေရာချထားမှုအခြေအနေများနှင့် နမူနာဆောက်လုပ်ထားသည့် ကျေးလက်လူနေအိမ်ပုံစံများ ပြီးစီးနေမှု အခြေအနေများကိုလည်းကောင်း၊ ပြန်လည်ဝင် ရောက်လာသူများ၏ ကျန်းမာရေး စောင့်ရှောက်မှုလုပ်ငန်းများအတွက် ဆေးခန်းများ၊ စာသင် ကျောင်းများ ဖွင့်လှစ်ထားရှိမှု အခြေအနေများကို လည်းကောင်း လိုက်လံကြည့်ရှုစစ်ဆေးကြသည်။

ယင်းနောက် ဗြင်ဖြူ နယ်ခြားစောင့်ရဲကင်းစခန်းအတွင်း  ရိက္ခာဂိုဒေါင် ပြန်လည်ပြင်ဆင် ဆောက်လုပ် နေသည့် အခြေအနေများအား သွားရောက်ကြည့်ရှုစစ်ဆေးကြပြီး ပြည်ထောင်စုဝန်ကြီးများနှင့် တာဝန်ရှိသူ များက လိုအပ်သည်များကို ပေါင်းစပ်ညှိနှိုင်း ပေးခဲ့ကြကြောင်း သတင်းရရှိသည်။