လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်သက်ခိုင် နှင့်အဖွဲ့သည် (၂၃-၁၀-၂၀၂၂) ရက်နေ့၊ နံနက်ပိုင်းတွင် ရွှေပြည်သာမြို့တွင်တည်ရှိသော လူမှုဝန်ထမ်းဦးစီးဌာနလက်အောက်ရှိ လူငယ်သင်တန်းကျောင်း (ရွှေပြည်သာ) တည်ဆောက်ရေး လုပ်ငန်းခွင်သို့ရောက်ရှိကြရာ တိုင်းဒေသကြီးဦးစီးမှူးက မှုခင်းစစ်ဆေးဆဲ ကလေးသူငယ် (ရီမန်ကျောင်းသား) များ လက်ခံစောင့်ရှောက်ရန် ရည်ရွယ်ချက်ဖြင့် သင်တန်းကျောင်း တည်ဆောက်ရေးလုပ်ငန်းများဖြစ်သည့် ကျောင်းအုပ်ကြီးရုံး၊ သင်တန်းသားအိပ်ဆောင်၊ ထမင်းစားဆောင်၊ မီးဖိုဆောင်များ ဆောက်လုပ်ပြီးစီးမှုအခြေအနေနှင့် သင်တန်းကျောင်း ပရိဝုဏ်အတွင်း အဆောက်အဦများ ထပ်မံဆောက်လုပ်ရန်လျာထားသည့်အကွက်ချပုံစံအား ရှင်းလင်းတင်ပြခဲ့ပါသည်။ ဆက်လက်၍ ပြည်ထောင်စုဝန်ကြီးက လက်ရှိဆောင်ရွက်ဆဲ သင်တန်းကျောင်း တည်ဆောက်ရေးလုပ်ငန်းများ ရာနှုန်းပြည့်ပြည့်စုံပြီးစီးနိုင်ရေး၊ ဝန်ထမ်းအင်အားခွင့်ပြုခန့်အပ်နိုင်ရေး၊ သင်တန်းကျောင်းသို့ရောက်ရှိလာသော ကလေးသူငယ်များအား စိုက်ပျိုးရေး၊ မွေးမြူရေးကိုအခြေခံသည့် အသက်မွေးဝမ်းကျောင်းပညာရပ်များပို့ချပေးနိုင်ရေး စီမံဆောင်ရွက်သွားရန် လမ်းညွှန်မှာကြားခဲ့ပါသည်။ ထို့နောက် ပြည်ထောင်စုဝန်ကြီးနှင့်အဖွဲ့သည် သင်တန်းကျောင်းအတွင်းရှိ တည်ဆောက်ပြီးစီးပြီဖြစ်သည့် သင်တန်းသားအိပ်ဆောင်၊ ထမင်းစားဆောင်၊ မီးဖိုဆောင်နှင့် ကွန်ကရစ်လမ်းခင်းကျင်းပြီးစီးမှုအခြေအနေများကို လှည့်လည်ကြည့်ရှု့စစ်ဆေးခဲ့ပြီး ပြည်ထောင်စုဝန်ကြီးက အဆောက်အဦများအလင်းရောင်နှင့် လေဝင်လေထွက်ကောင်းမွန်စေရေး စီမံဆောင်ရွက်သွားရန်၊ ရေစီးရေလာကောင်းမွန်စေရေး စီမံဆောင်ရွက်သွားရန်စသဖြင့် လမ်းညွှန်မှာကြားခဲ့ပါသည်။

     ဆက်လက်၍ ပြည်ထောင်စုဝန်ကြီးနှင့်အဖွဲ့သည် မရမ်းကုန်းမြို့နယ်ရှိ မူးယစ်ပြန်လည်ထူထောင်ရေးစခန်း (ရန်ကုန်) သို့ ရောက်ရှိကြရာ ပြန်လည်ထူထောင်ရေးဦးစီးဌာန၊ ညွှန်ကြားရေးမှူးချုပ်က ဖွဲ့စည်းပုံ၊ ဝန်ထမ်းခန့်အပ်ပြီးစီးမှုနှင့် ဆောင်ရွက်ပြီး၊ ဆောင်ရွက်ဆဲ၊ ဆက်လက်ဆောင်ရွက်မည့် လုပ်ငန်းများနှင့်ပတ်သက်၍ ရှင်းလင်းတင်ပြခဲ့ရာ ပြည်ထောင်စုဝန်ကြီးက မူးယစ်ဆေးဖြတ်ပြီးသူများ လူ့အဖွဲ့အစည်းအတွင်း ပြန်လည်ဝင်ဆံ့ ပေါင်းစည်းနိုင်ရေး ဆောင်ရွက်နိုင်ခြင်းဖြင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးကို တစ်ဖက်တစ်လမ်းမှ ဖြည့်ဆည်းပေးနိုင်မည်ဖြစ်ပါကြောင်း၊ လတ်တလောအသိပညာပေးလုပ်ငန်းများဆောင်ရွက်မှုအပေါ် အားသာချက်၊ အားနည်းချက်များ ပြန်လည်သုံးသပ်ရန်လိုအပ်ပါကြောင်း၊ လုပ်ငန်းဆောင်ရွက်မှုအခြေအနေများကို ကိန်းဂဏန်း အချက် အလက် မှန်ကန်တိကျစွာဖြင့် စနစ်တကျပြုစုမှတ်တမ်းတင်ထားရန် လိုအပ်ပါကြောင်း၊ စခန်းအခြေပြုသင်တန်းများဖွင့်လှစ်ပြီးစီးပါက ၎င်းတို့တတ်မြောက်ထားသော ပညာရပ်များဖြင့် အသက်မွေးဝမ်းကြောင်းလုပ်ငန်းများ ဆက်လက်လုပ်ဆောင်နိုင်ရေးအတွက် အရပ်ဘက်လုပ်ငန်းရှင်အဖွဲ့အစည်းများနှင့် ချိတ်ဆက်ပေးသွားရန် လိုအပ်ပါကြောင်းဖြင့် လမ်းညွှန်မှာကြားခဲ့ပါသည်။ ဆက်လက်၍ ပြည်ထောင်စုဝန်ကြီးနှင့်အဖွဲ့သည် သင်တန်းဆောင်အတွင်း ပြင်ဆင်ဆောင်ရွက်ထားရှိမှု အခြေအနေများကို လှည့်လည်ကြည့်ရှု့စစ်ဆေးခဲ့ပြီး လိုအပ်ချက်များအား လမ်းညွှန်မှာကြားခဲ့ပါသည်။

     ဆက်လက်၍ မွန်းလွဲပိုင်းတွင် ပြည်ထောင်စုဝန်ကြီးနှင့်အဖွဲ့သည် ကြည့်မြင်တိုင်မျက်မမြင် ကျောင်းသို့ရောက်ရှိကြရာ တာဝန်ခံကျောင်းအုပ်က အမြင်အာရုံချို့တဲ့သူများအား ကိုယ်ရည်ကိုယ်သွေးမြင့်မားပြီး မိမိကိုယ်ကိုယ် ယုံကြည်မှုရှိပြီး ဘဝရပ်တည်ထူထောင်နိုင်ရေးအတွက် လေ့ကျင့် သင်ကြားပေးနေမှုအခြေအနေများအား ရှင်းလင်းတင်ပြခဲ့ပါသည်။ ဆက်လက်၍ ပြည်ထောင်စုဝန်ကြီးက အမြင်အာရုံ မသန်စွမ်းသူများ ဘက်စုံဖွံ့ဖြိုးတိုးတက်စေရေးအတွက် ၎င်းတို့ သင်ယူလျက်ရှိသည့် ပညာရပ်များအပေါ် စိတ်ဝင်တစား တက်ကြွစွာ ပူးပေါင်းပါဝင်နိုင်ရေးဆောင်ရွက်သွားရန် လိုအပ်ပါကြောင်း၊ အလုပ်အကိုင်အခွင့်အလမ်းများရရှိနိုင်ရေး  ကူညီပေးသွားရန်ဖြစ်ပါကြောင်း၊ မျက်မမြင် လက်စမ်းစာပေများ၊ Audio Book များ စုံလင်ကျယ်ပြန့်စွာ ရရှိနိုင်ရေး၊ လိုအပ်ချက်များအား Check List ဖြင့် ပြုစုထားရန်ဖြစ်ပါကြောင်း၊ ပုဂ္ဂလိက မသန်စွမ်းကျောင်းများအား ဖိတ်ခေါ်၍ စုပေါင်းပြိုင်ပွဲ များ ကျင်းပသွားရန်လိုအပ်ပါကြောင်း လမ်းညွှန်မှာကြားခဲ့ပါသည်။ ထို့နောက် ပြည်ထောင်စုဝန်ကြီး နှင့်အဖွဲ့သည် သင်တန်းကျောင်းအတွင်းရှိ သင်တန်းသားများ မျက်မမြင်လက်စမ်းစာပေများ ထုတ်လုပ်နေမှုအခြေအနေများ၊ စာပေ၊ ဂီတ၊ ရသ၊ အားကစားစသည့်ပညာရပ်များအား လေ့ကျင့်သင်ယူနေမှု အခြေအနေများနှင့် မျက်မမြင် အကြောပြင်ပညာရပ်များ လေ့ကျင့်သင်ကြားနေမှုအခြေအနေများကို လှည့်လည်ကြည့်ရှု အားပေးခဲ့ပါသည်။

    ဆက်လက်၍ ပြည်ထောင်စုဝန်ကြီးနှင့် တာဝန်ရှိသူများသည် (၂၄-၁၀-၂၀၂၂) ရက်နေ့၊ နံနက်ပိုင်းတွင် ထောက်ကြန့်မြို့ရှိ လူမှုဝန်ထမ်းဦးစီးဌာန အမျိုးသမီးကလေးများသင်တန်းကျောင်း (ထောက်ကြန့်) သို့ ရောက်ရှိကြရာ တာဝန်ခံကျောင်းအုပ်က သင်တန်းကျောင်း၏ ရည်ရွယ်ချက်နှင့်ဆောင်ရွက်နေမှုအခြေအနေများအား ရှင်းလင်းတင်ပြခဲ့ပြီး ပြည်ထောင်စုဝန်ကြီးက သင်တန်းကျောင်းတိုးတက်ရေး၊ လက်ခံစောင့်ရှောက်ထားသောကလေးသူငယ်များ ပညာရည်တိုးတက်ရေး၊ အသက်မွေးဝမ်းကျောင်းပညာများ သင်ကြားလေ့ကျင့်နိုင်စေရေး၊ လူမှုအသိုင်းအဝိုင်းအတွင်း ပြန်လည်ဝင်ဆံ့နိုင်စေရေးနှင့် နေ့စဉ်နေထိုင်မှုဘဝအဆင်ပြေ ချောမွေ့စေရေးတို့အတွက် လိုအပ်ချက်များအားမှာကြားဖြည့်ဆည်းဆောင်ရွက်ပေးခဲ့ပြီး အသက်မွေးဝမ်းကြောင်းပညာရပ်များ သင်ယူနေမှုအခြေအနေများနှင့် သင်တန်းသူအိပ်ဆောင်၊ ထမင်းစားဆောင်များအား လှည့်လည်ကြည့်ရှုစစ်ဆေးကာ လိုအပ်ချက်များအား ဖြည့်ဆည်းဆောင်ရွက်ပေးခဲ့ကြောင်း သတင်းရရှိပါသည်။