နေပြည်တော်၊ ၁၃.၁၁.၂၀၁၈

          လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဦးစိုးအောင်အား စွမ်းဆောင်ရည်အကဲဖြတ်မှုအဖွဲ့၊ အာရှ-ပစိဖိတ် အမျိုးသားလူ့အခွင့်အရေး အဖွဲ့အစည်းဖိုရမ်(APF) သည် အဆိုပါဝန်ကြီးဌာနတွင် လာရောက်တွေ့ဆုံခဲ့ပါသည်။

တွေ့ဆုံရာတွင် ဝန်ကြီးဌာနမှ ဆောင်ရွက်လျက် ရှိသောလုပ်ငန်းများတွင် မြန်မာနိုင်ငံ အမျိုးသားလူ့အခွင့်အရေးကော်မရှင်နှင့် ပူးပေါင်းဆောင်ရွက်နေမှုများ၊ လူငယ်များ၊ အမျိုးသမီးများ၊ ကလေးသူငယ်များ၊ မသန်စွမ်းသူများ၊ သက်ကြီးရွယ်အိုများ၊ နေရပ်စွန့်ခွာသူများ၊ ရွှေ့ပြောင်းသွားလာသူ အလုပ်သမားများ၊ မူးယစ်ဆေးဝါးနှင့် ပတ်သက်၍ ပြန်လည် ထူထောင်ရေးလုပ်ငန်းများ၊ မူဝါဒများ၊ ဥပဒေ၊ နည်းဥပဒေများ ချမှတ်ရေးဆွဲဆောင်ရွက်ရာတွင် လည်းကောင်း၊ ပြင်ဆင်ရေးဆွဲရာတွင် မြန်မာနိုင်ငံ အမျိုးသားလူ့အခွင့်အရေးကော်မရှင်နှင့် နီးကပ်စွာဆောင်ရွက်နေမှုများ၊ ကော်မရှင်က သက်ဆိုင်ရာအမျိုးသားအဆင့် ကော်မတီများတွင် အဖွဲ့ဝင်များအဖြစ်ပါဝင် ဆောင်ရွက် နေမှုများ၊ ဝန်ကြီးဌာနမှ ဝန်ထမ်းများအား လူ့အခွင့်အရေးနှင့် ပတ်သက်သည့် အသိပေး ဆောင်ရွက်နေမှုများ၊ စွမ်းဆောင်ရည်မြှင့်တင်ရေး သင်တန်းများအား မြန်မာနိုင်ငံ အမျိုးသားလူ့အခွင့်အရေးကော်မရှင်မှ ဆောင်ရွက်ပေးနေခြင်း၊ ဝန်ကြီးဌာန အနေဖြင့်လည်း ကုလသမဂ္ဂအဖွဲ့အစည်းများ၊ နိုင်ငံတကာအဖွဲ့အစည်းများ၊ လူမှုရေးအဖွဲ့အစည်းများနှင့် ပူးပေါင်း၍ နိုင်ငံတကာစံနှုန်းများနှင့်အညီ လူသားချင်း စာနာထောက်ထားမှု အကူအညီပေးအပ်နေမှု အခြေအနေများ၊ လူ့အခွင့်အရေးကော်မရှင်မှ အကြံပြုချက်များအား အကောင်အထည်ဖေါ်ဆောင်ရွက်နေမှုတို့နှင့် ပတ်သက်၍ ရှင်းလင်းဆွေးနွေး ခဲ့ပါကြောင်း သတင်းရရှိပါသည်။