နေပြည်တော်၊ ၂၇.၁၂.၂၀၁၈

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြန်လည်ထူထောင်ရေးဦးစီးဌာနနှင့် Japan Heart, International Medical Volunteersတို့ပူးပေါင်းဆောင်ရွက်သည့် 4^th Steering Committee for blind massage system development (စတုတ္ထအကြိမ်မြောက် မျက်မမြင်အကြောပြင်အနှိပ်စနစ် ဖွံ့ဖြိုးတိုးတက်ရေး ကော်မတီအစည်းအဝေး) ကိုနေပြည်တော်၊ ဇမ္ဗူသီရိဟိုတယ်တွင်၂၀၁၈ခုနှစ်၊ ဒီဇင်ဘာလ၂၇ရက်နေ့တွင် ပြုလုပ်ဆောင်ရွက်ခဲ့ပါသည်။

            လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြန်လည်ထူထောင်ရေးဦးစီးဌာနမှညွှန်ကြားရေးမှူးချုပ် ဦးဝင်းနိုင်ထွန်းကပြောကြားရာတွင် ယနေ့ကျင်းပပြုလုပ်သောအစည်းအဝေးသည် အနှိပ်စနစ်ဖွံ့ဖြိုးရေးကော်မတီ၏ စတုတ္ထအကြိမ်မြောက် အစည်းအဝေးဖြစ်ပါကြောင်း၊ အဆိုပါ ကော်မတီကို ၂၀၁၈ခုနှစ်၊ ဇန်နဝါရီလ ၂၂ရက်နေ့တွင် စတင်ဖွဲ့စည်းခဲ့ပြီးရည်ရွယ်ချက်မှာရပ်ရွာအတွင်းရှိမျက်မမြင်များအလုပ်အကိုင် အခွင့်အလမ်းရရှိစေရန်နှင့်၄င်းတို့၏ ဘဝဖွံ့ဖြိုးတိုတက်စေရန်အတွက် အဓိကရည်ရွယ်၍ ဆောင်ရွက်ခြင်းဖြစ်ပါကြောင်း၊ ယနေ့အချိန်အခါ၌ ယေန

အစိုးရလက်ထက်တွင် ပြည်သူများ၏အခြေခံဘဝဖွံ့ဖြိုးတိုးတက်စေရန်၊ လူမှုဘဝဖွံ့ဖြိုးတိုးတက်စေရန်အတွက် လူမှုကာကွယ်စောင့်ရှောက်ရေးနည်းလမ်းများဖြင့် အလေးထားဆောင်ရွက်နေပါကြောင်း၊လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၏ လုပ်ငန်းများသည် ပဋိသန္ဓေတည်စမှ သက်ကြီးရွယ်အိုသည်အထိလူမှုကိစ္စအဝဝကိုလူမှုကာကွယ် စောင့်ရှောက်ရေးနည်းလမ်းများဖြင့် ဆောင်ရွက်နေပါကြောင်း၊ ပဋိသန္ဓေတည်စ(ကိုယ်ဝန်ဆောင်)မှ အသက်(၂)နှစ်ထိနိုင်ငံတော်ဘတ်ဂျက်ဖြင့်ထောက်ပံ့မှုများပြုလုပ်နေပါကြောင်း၊ထိုသို့ထောက်ပံ့မှုများတွင် ပြည်နယ်များ၊ ကိုယ်ပိုင် အုပ်ချုပ်ခွင့်ရဒေသဖြစ်သောနာဂဒေသ ၊ ချင်းပြည်နယ်၊ ရခိုင်၊ ကရင်၊ ကယား၊နောက်ပိုင်း၌ကျန်ရှိသည့် တိုင်းဒေသကြီး/ပြည်နယ်များတွင် Special Protectionဖြစ်သောလူမှုကာကွယ်စောင့်ရှောက်ရေးလုပ်ငန်းများဆက်လက်၍ဆောင်ရွက်သွားမည် ဖြစ်ပါကြောင်း၊ ဒါ့အပြင် လူမှုကာကွယ်စောင့်ရှောက်ရေးနည်းလမ်းများနှင့် အကောင်အထည်ဖော် ဆောင်ရွက်လျက်ရှိပါကြောင်း၊ ရှေးဦးကလေးသူငယ်ပြုစုစောင့်ရှောက်ရေးများ၊လူငယ်ရေးရာမူဝါဒများ၊မိခင်ဝိုင်းများ၊ မသန်စွမ်းသူများ၊ လူကုန်ကူးခံရသူများ၊ မူးယစ်ဆေးဖြတ်ပြီးသူများစသည်ဖြင့်ရေရှည်တွင်ဖွံ့ဖြိုးတိုးတက်ရန် ဆက်လက်တိုးမြှင့်ဆောင်ရွက်လျက်ရှိပါကြောင်း၊

            မသန်စွမ်းသူများနှင့် သက်ကြီးရွယ်အိုများ၏ အရေးကိစ္စများ၊ ကလေးနှင့် အမျိုးသမီးများ၊ စစ်ဘေးရှောင်စခန်းရှိမိသားစုများ၊ ပြည်တွင်း/ပြည်ပမှ ရွှေ့ပြောင်းသွားလာနေထိုင်သောသူများ၊ လူကုန်ကူးခံရသူများ၊ မူးယစ်ဆေးဖြတ်ပြီးသူများနှင့်ပတ်သက်၍ ပြန်လည်ထူထောင်ရေးလုပ်ငန်းများအားဝန်ကြီးဌာနမှ ဆောင်ရွက်ပေးလျက်ရှိပါကြောင်း၊ ထိုထဲမှ မသန်စွမ်းသူများအခွင့်အရေးအပြည့်အဝရရှိရန် မသန်စွမ်းသူများအခွင့်အရေးများဆိုင်ရာအမျိုးသားကော်မတီ၊ လုပ်ငန်းကော်မတီ၊ တိုင်းဒေသကြီးကော်မတီများဖွဲ့စည်း ၍ ဥပဒေ၊ နည်းဥပဒေများပြဌာန်းပြီးဆပ်ကော်မတီ၊ လုပ်ငန်းကော်မတီများအားအကောင်အထည်ဖော်ရန် ဆောင်ရွက်လျက်ရှိပါကြောင်း၊ အမြင်အာရုံမသန်စွမ်းသူများအတွက်  အလုပ်အကိုင်ရရှိစေရန်အတွက်လည်းကောင်းယနေ့ ပြုလုပ်သောအစည်းအဝေးမှရေရှည်တွင်ဆက်လက်ပြီးအကောင်အထည်ဖော်ဆောင်ရွက်ရန်အတွက် လုပ်ဆောင်ခြင်းဖြစ်ပါကြောင်း၊

            မြန်မာနိုင်ငံတွင် မျက်မမြင်များအတွက် အဓိကအလုပ်အကိုင်သည်အကြောပြင်အနှိပ်လုပ်ငန်းပင်ဖြစ်ပါကြောင်း၊ အလုပ်လုပ်ကိုင်သောမျက်မမြင်များအနက် ၇၅ရာခိုင်နှုန်းသည် ဤအလုပ်ကိုလုပ်ကိုင်နေသူများဖြစ်ကြပါကြောင်း၊ ထို့ကြောင့်နိုင်ငံတော်အစိုးရမှ မျက်မမြင်အသိုင်းအဝန်းအတွင်းအလုပ်အကိုင်မှန်မှန်ကန်ကန်နှင့် စည်းစနစ်ကျကျ အကာအကွယ်ပေးပြီးသေချာပေါက်အလုပ်အကိုင်ရရှိစေရန် လုပ်ဆောင်နေခြင်းပင် ဖြစ်ပါ ကြောင်း၊ မြန်မာနိုင်ငံတွင်သာမကတောင်ကိုးရီးယား၊ ထိုင်ဝမ်၊ ထိုင်း၊ မွန်ဂိုလီးယား၊ ဖိလစ်ပိုင်နှင့်ဂျပန်စသည့် နိုင်ငံများတွင် မျက်မမြင်များအတွက် အကြောပြင်အနှိပ်လုပ်ငန်းအားဥပ​ဒေများပြဌာန်းပြီးအလေးထားဆောင်ရွက် နေခြင်းပင်ဖြစ်ပါကြောင်း၊ ဂျပန်နိုင်ငံတွင် မသန်စွမ်းသူများအလုပ်အကိုင်ရရှိရေးအတွက် ဥပဒေကို၁၉၇၆ခုနှစ်မှစ၍ ဝေပုံကျစနစ်ဖြင့် တိုးမြှင့်ပြဌာန်းပြီး ၁.၃ရာခိုင်နှုန်းအဖြစ်ဆောင်ရွက်ခဲ့တာရှိပါကြောင်း၊ ယခုလက်ရှိဂျပန်နိုင်ငံတွင် မသန်စွမ်းသူများအလုပ်အကိုင်ရရှိရေးသည် ၂.၂ရာခိုင်နှုန်းထိတိုးမြှင့်ပြီးအလုပ်အကိုင်ရရှိရေးအတွက် လုပ်နေတာရှိပါကြောင်း၊ ယခုနောက်ပိုင်းတွင် ဂျပန်နိုင်ငံရှိကုမ္ပဏီများသည် ၄င်းတို့၏ဝန်ထမ်းများကျန်းမာရေးအတွက် စဉ်စားလာပါကြောင်း၊ ၂.၂ရာခိုင်နှုန်းအလုပ်ခန့်ထားရန်စဉ်းစားလာရာတွင် မျက်မမြင်အကြောပြင်အနှိပ်လုပ်ငန်းများကိုကုမ္ပဏီများတွင် အလုပ်ခန့်ထား၍ ဝန်ထမ်းများ၏ကျန်းမာရေးကိုစောင့်ရှောက်ပေးခြင်းများရှိပါကြောင်း၊ထိုင်း၊ ထိုင်ဝမ်၊ ဖိလစ်ပိုင်နှင့် ဂျပန်နိုင်ငံများတွင် အကြောပြင်အနှိပ်လုပ်ငန်းအတွက် Focal Ministryအဖြစ်ကျန်းမာရေးဝန်ကြီးဌာနမှ မသန်စွမ်းသူများအလုပ်အကိုင်ရရှိရန် ရေးဆွဲလျက်ရှိပါကြောင်း၊

                  မြန်မာနိုင်ငံတွင် မျက်မမြင်အကြောပြင်အနှိပ်စနစ်အားဖွံ့ဖြိုးတိုးတက်ရန်အတွက် ဂျပန်-မြန်မာပူးပေါင်းပြီးမျက်မမြင်များ၏ စာမေးပွဲဖြေဆိုမှုများ၊ စာစစ်ခြင်းများ၊ ကောင်းမွန်သောအောင်လက်မှတ်ဖြစ်စေရန်၊ စံသင်ရိုးညွှန်းတမ်းများဖြစ်မြောက်ရန် ပြန်လည်ထူထောင်ရေးဦးစီးဌာနမှ ဆက်လက်ကြိုးပမ်းအကောင်အထည်ဖော် ဆောင်ရွက်သွားမည်ဖြစ်ပါကြောင်းပြောကြားခဲ့ပါသည်။

အစည်းအဝေးသို့ ပြန်လည်ထူထောင်ရေးဦးစီးဌာနမှ ညွှန်ကြားရေးမှူးချုပ်နှင့်တာဝန်ရှိသူများ၊Japan Heart မှ တာဝန်ရှိသူများ၊လူမှုဝန်ထမ်းဦးစီးဌာနလက်အောက်ရှိကြည့်မြင်တိုင်မျက်မမြင်ကျောင်းနှင့် စစ်ကိုင်းမျက်မမြင်ကျောင်းတာဝန်ရှိသူများ၊မြန်မာနိုင်ငံမျက်မမြင်အသင်း၊ Nagomiအနှိပ်ဆေးခန်း၊ ပြင်ဦးလွင်မျက်မမြင်ကျောင်း၊ မိတ္ထီလာမျက်မမြင်ကျောင်း၊ စသည့် မျက်မမြင်ကျောင်းများမှ တာဝန်ရှိသူများစုစုပေါင်း (၃၀)ဦးခန့် တက်ရောက်ခဲ့ကြပါသည်။