ပြည်ထောင်စုဝန်ကြီးကဆွေးနွေးပြောကြားရာတွင် (UEHRD)  ကော်မတီကို ပြည်ထောင်စုစီမံကိန်းတစ်ခုအနေဖြင့် စတင်ဖွဲ့စည်းခဲ့ပါကြောင်း၊ အဆိုပါကော်မတီတွင် နိုင်ငံတော်၏အတိုင်ပင်ခံပုဂ္ဂိုလ် က ဥက္ကဌအဖြစ်ဆောင်ရွက်၍ ဒုတိယဥက္ကဌတစ်ဦးနှင့် အဖွဲ့ဝင် (၂)ဦးဖြင့် ၂၀၁၇ခုနှစ်၊ အောက်တိုဘာလ(၁၇)ရက် နေ့ကဖွဲ့စည်းခဲ့ခြင်းဖြစ်ပြီး ၂၀၁၈ခုနှစ်၊ အောက်တိုဘာလ(၂၉)ရက်နေ့တွင် ကော်မတီဝင်(၉)ဦးဖြင့် ပြောင်းလဲ ပြင်ဆင်ဖွဲ့စည်း ခဲ့ပါကြောင်း၊ ရခိုင်ပြည်နယ်နှင့် ပတ်သက်၍ ရခိုင်ပြည်နယ် တည်ငြိမ်အေးချမ်းမှုနှင့် ဖွံ့ဖြိုးမှုတိုးတက်ရေးအကောင်အထည်ဖော်ရေးဗဟိုကော်မတီ၊ ရခိုင်ပြည်နယ်ဆိုင်ရာ အကြံပြုချက်များ အကောင်အထည်ဖေါ်ရေးကော်မတီ၊ နေရပ်စွန့်ခွါသူများ ပြန်လည်လက်ခံရေး နှင့်ပြန်လည်နေရာချထားရေးကော်မတီများကိုဖွဲ့စည်းဆောင်ရွက်လျက်ရှိရာ ဤကော်မတီများ သည် တစ်ခုနှင့်တစ်ခု ချိတ်ဆက်ဆောင်ရွက်လျက်ရှိပါကြောင်း၊ UEHRD ပြည်ထောင်စု စီမံကိန်းသည် ရခိုင်ပြည်နယ်အတွင်း လူမှုစီးပွားဖွံ့ဖြိုးတိုးတက်ရေးကို လုပ်ငန်းအဖွဲ့ (၁၀)ဖွဲ့ဖြင့် အလေးထားဆောင်ရွက်လျက်ရှိရာ ထိုလုပ်ငန်းအဖွဲ့များ ပိုမိုချိတ်ဆက် ဆောင်ရွက်နိုင်ရန် အရေးကြီးပါကြောင်း၊     UEHRD သည် နိုင်ငံအတွင်းရှိ နိုင်ငံသူ၊ နိုင်ငံသားများ၊ ပြည်ပရောက် မြန်မာများ၏ စုပေါင်းအား၊ မိတ်ဆွေနိုင်ငံများနှင့် အဖွဲ့အစည်းများ၏ ပူးပေါင်းဆောင်ရွက်မှုတို့ဖြင့် ဆောင်ရွက်လျက်ရှိရာ ရန်ပုံငွေများထပ်မံရရှိရေး ဆက်လက်ကြိုးစားဆောင်ရွက်ရန် လိုအပ်ပါကြောင်း၊ UEHRD ၏ရန်ပုံငွေသုံးစွဲမှုများနှင့်ပတ်သက်၍ ပြည်ထောင်စုစာရင်းစစ်ချုပ်ရုံး၏ စစ်ဆေးမှု အပြင် နိုင်ငံတကာ စစ်ဆေးမှုအဖွဲ့တစ်ဖွဲ့ကိုပါ ငှားရမ်းစစ်ဆေးမည်ဖြစ်သဖြင့် လုပ်ထုံးလုပ်နည်းများနှင့် အညီဆောင်ရွက်လျက်ရှိပါကြောင်း၊ UEHRD၏လုပ်ငန်းစဉ်များပေါ်တွင် အားလုံးက ရှင်းရှင်းလင်းလင်း သိမြင်သဘောပေါက်ပြီး ပူးပေါင်းပါဝင်ဆောင်ရွက်လာနိုင်ရေး အတွက် သက်ဆိုင်ရာ ကဏ္ဍအသီးသီးက ဝိုင်းဝန်းဆောင်ရွက်ပေးရန်လိုအပ်ပါကြောင်း ပြောကြားခဲ့ပါသည်။
    ထို့နောက် ဒုတိယဥက္ကဌ(၂)၊ နိုင်ငံတော်အတိုင်ပင်ခံရုံးဝန်ကြီးဌာန၊ ဒုတိယဝန်ကြီး ဦးခင်မောင်တင်က နိုင်ငံတကာနှင့်ပူးပေါင်းဆောင်ရွက်မှုများတွင် အလေးထားသင့်သည် အချက်အလက်များကို ရှင်းလင်းတင်ပြပြီး အတွင်းရေးမှူး ဒုတိယဝန်ကြီးဦးစိုးအောင်က UEHRD ၏ လက်ရှိလုပ်ငန်းဆောင်ရွက်နေမှုအခြေအနေများကို ရှင်းလင်းဆွေးနွေးပါသည်။ ဆက်လက်၍ တွဲဖက်အတွင်းရေးမှူး ပြည်ထောင်စုအစိုးရအဖွဲ့ရုံး၊ အမြဲတမ်းအတွင်းဝန် ဦးဇော်သန်းသင်းက လက်ရှိမြေပြင်အခြေအနေများနှင့် ပတ်သက်၍ရှင်းလင်းတင်ပြပြီး UEHRD အကြံပေးအဖွဲ့ဝင် ဦးတိုးအောင်၊ သတင်းနှင်ဆက်သွယ်ရေး ဒါရိုက်တာ ဦးကျော်မြိုင်နှင့် ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးကျော်လင်းတို့က လိုအပ်ချက်များကို အသီးသီးဆွေးနွေးတင်ပြကြပြီး ဒုတိယဥက္ကဌ(၁)၊ ပြည်ထောင်စုဝန်ကြီးဒေါက်တာဝင်းမြတ်အေးက နိဂုံးချုပ်စကား ပြောကြားခဲ့ကြောင်း သတင်းရရှိပါသည်။