အမှတ်စဉ်(၈)စက်ချုပ်နှင့်မုန့်မျိုးစုံသင်တန်းဆင်းပွဲအခမ်းအနားကို မတ်လ(၃၁)ရက်နေ့၊ နံနက်(၉:၀၀)နာရီတွင် တနင်္သာရီတိုင်းဒေသကြီး၊ ထားဝယ်မြို့၊ အိမ်တွင်းမှုသက်မွေးလုပ်ငန်း ပညာသင်ကျောင်းခန်းမ၌ ကျင်းပပြုလုပ်ခဲ့ပါသည်။
     အခမ်းအနားတွင်တိုင်းဒေသကြီးဦးစီးမှူးမှ အိမ်တွင်းမှုအသက်မွေးဝမ်းကျောင်းပညာများကို ဖွင့်လှစ်ပေးခြင်းဖြင့်အမျိုးသမီးများ ကိုယ်ပိုင်ဝင်ငွေရရှိခြင်း၊ အလုပ်အကိုင်ရရှိခြင်း၊ မိမိကိုယ်ကို ယုံကြည်မှုမြင့်မားလာခြင်း၊ ဆင်းရဲမှုလျှော့ချခြင်းနှင့် လူမှုစီးပွားဘဝမြင့်တက်လာခြင်းစသည့် အကျိုးကျေးဇူးများရရှိသည့်အပြင် အမျိုးသမီးများ၏ စွမ်းဆောင်ရည်များမြင့်မားလာကာ အမျိုးသမီးများအပေါ် အကြမ်းဖက်မှုများကိုလည်း လျော့ကျမှုကို အထောက်အပံ့ဖြစ်စေကြောင်း၊ ယခုသင်တန်းကရရှိသော ပညာရပ်များကိုအမျိုးသမီးများ၏ဘဝရပ်တည်မှု၊ ကိုယ်ပိုင်ဝင်ငွေ၊ မိသားစုဝင်ငွေများကို တစ်ပိုင်တစ်နိုင်ရရှိနိုင်ပြီး အလုပ်အကိုင်အခွင့်အလမ်းရှာဖွေနေသူများအတွက်လည်း များစွာအထောက်အကူပြုမည်ဟုယုံကြည်ကြောင်း၊ သင်တန်းသူများအနေဖြင့် သင်တန်းကရရှိသောပညာရပ်များကို မိမိကိုယ်တိုင်၊ မိသားစုနှင့်ပတ်ဝန်းကျင်အတွက်ပါ အကျိုးရှိစွာပြန်လည်အသုံးချသွားကြရန်လိုအပ်ကြောင်းပြောကြားခဲ့ပါသည်။
ထို့နောက် အိမ်တွင်းမှုသက်မွေးလုပ်ငန်းပညာသင်ကျောင်း၊ ကျောင်းအုပ်မှ ဒေသခံအမျိုးသမီးများ အလုပ်အကိုင်အခွင့်အလမ်းများရရှိရန်၊ အမျိုးသမီးများ အသက်မွေးဝမ်းကျောင်းပညာများရရှိခြင်းဖြင့် မိမိကိုယ်မိမိရပ်တည်နိုင်ရန်နှင့် တဖက်တလမ်းမှဝင်ငွေများရရှိစေရန်၊ နိုင်ငံတော်ကုန်ထုတ်စွမ်းအား ပိုမိုမြင့်မားစေရန်နှင့် အမျိုးသမီးများဘဝပိုမိုဖွံ့ဖြိုးတိုးတက်စေရန်စသည့် ရည်ရွက်ချက်ဖြင့် ဖွင့်လှစ်ခြင်းဖြစ်ကြောင်း ပြောကြားခဲ့ပါသည်။
      ဆက်လက်၍ဌာနဆိုင်ရာတာဝန်ရှိသူများက သင်တန်းသူများအား သင်တန်းဆင်း လက်မှတ်ပေးအပ်ပြီး သင်တန်းသူများကိုယ်စား သင်တန်းသူ ဒေါ်ဇာနီစိုးက ကျေးဇူးတင်စကားပြောကြားကာ တက်ရောက်လာကြသူများက သင်တန်းသူများ ချုပ်လုပ်ထားသော ဝတ်စုံများအား လိုက်လံကြည့်ရှု့အားပေးခဲ့ကြပါသည်။