အစည်းအဝေးတွင် ပြည်ထောင်စုဝန်ကြီး ဒေါက်တာသက်သက်ခိုင်က လမ်းညွှန်အမှာစကား ပြောကြားရာ၌ နယ်စပ်ရေးရာဝန်ကြီးဌာနက ဖွင့်လှစ်သော ပြည်ထောင်စု တိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ်မှ သင်တန်းဆင်း သူများဖြစ်သဖြင့် တိုင်းရင်းသားများကို စည်းစည်း လုံးလုံးရှိပြီး အရည်အချင်းရှိရှိ လေ့ကျင့်သင်ကြား ပျိုးထောင်ပေးခဲ့ပြီးဖြစ်သဖြင့် အစိုးရဝန်ကြီး ဌာနများ၊ ဒေသအသီးသီး၊ ဌာနအသီးသီးတွင် တာဝန်ထမ်းဆောင်ခွင့်ရရှိသည်မှာ ကံကောင်းကြပါ ကြောင်း၊ ကျောင်းသူ  (၄၀) ရာခိုင်နှုန်း ပါဝင်သည်ကို တွေ့ရှိရသဖြင့် အမျိုးသမီးများ၏ အခန်းကဏ္ဍ သည် တိုင်းပြည်တည်ဆောက်ရေးတွင် အရေးပါပါကြောင်း၊ မိမိဝန်ကြီးဌာန အနေဖြင့် UNCEDAW အပါအဝင် UN Convention များတွင် လက်မှတ်ရေးထိုးထားပါကြောင်း၊  Man , Money , Material များသည် အရေးပါပြီး  ၎င်းတွင် လူသားအရင်းအမြစ်သည် အရေးကြီးပါကြောင်း၊ လူငယ်များ အနေဖြင့် အရည်အချင်းရှိမှ တိုးတက်အောင်ပြုလုပ်နိုင်မည်ဖြစ်သဖြင့် လူငယ်များအား လေ့ကျင့် သင်ကြားပေးခြင်းဖြင့် လူသားအရင်းအမြစ် ဖွံ့ဖြိုးတိုးတက်အောင် လုပ်ဆောင်ရမည်ဖြစ်ပါကြောင်း၊ ကျောင်းသား/သူများအနေဖြင့် ကျောင်းအိပ် ကျောင်းစားနေရသည့်အတွက် ညီအကို မောင်နှမ  အရင်းသဖွယ် ချစ်ခင်ရင်းနှီးစွာ နေထိုင်ခဲ့ကြရမည်ဟု ယုံကြည်ပါကြောင်း၊ သင်တန်းဆင်းကျောင်းသား ကျောင်းသူများ အနေဖြင့် ၂၀၁၆ ခုနှစ်တွင် (၄၁) ဦး၊ ၂၀၁၇ ခုနှစ်တွင် (၇) ဦး၊ ၂၀၁၈ ခုနှစ်တွင် (၄) ဦး၊ ၂၀၁၉ ခုနှစ်တွင် (၂၅) ဦး၊ ၂၀၂၁ ခုနှစ်တွင် (၃၃) ဦး စုစုပေါင်း (၁၉၁) ဦး မိမိဝန်ကြီးဌာနသို့ ရောက်ရှိခဲ့ပြီး ဖြစ်ပါကြောင်း၊

          လူငယ်များအနေဖြင့် Education ၊ Experience ၊  Explore ၊ Ethic စသည့်အချက်များသည် အရေးကြီးပါကြောင်း၊ ဘဝတစ်သက်သာအတွက်အသုံးကျပါကြောင်း၊ တိုင်းဒေသကြီး/ ပြည်နယ် အသီးသီးမှလာရောက် ဆုံတွေ့ကြသူများဖြစ်ပါသဖြင့် မတူကွဲပြားမှုများအား အားသာချက်ဖြစ်အောင် စည်းလုံးချစ်ခင်စွာ နေထိုင်ကြစေလိုကြောင်း၊ မိမိနှင့် ဝန်ကြီးဌာန၊ မိမိနိုင်ငံတိုးတက်အောင် ဆောင်ရွက်ကြစေလိုကြောင်း၊ အမှားအမှန်ဆင်ခြင်နိုင်ပြီး လုပ်ငန်းတာဝန်များကို ထမ်းဆောင်ရန် လိုအပ်ပါကြောင်း၊ သင်ယူခဲ့သော်လည်း အတွေ့အကြုံသည်အရေးကြီးပါကြောင်း၊ ကိုယ်တိုင်လုပ်မှ ရမည်ဖြစ်ပါကြောင်း၊ အတွေ့အကြုံရှိသူများနှင့် ပူးပေါင်း ဆောင်ရွက်ရမည် ဖြစ်ပါကြောင်း၊ ကျောင်းသား/သူများအနေဖြင့် အလုပ်စတင်ဝင်ရောက်သည့်အချိန်၌ အကြီးတန်းစာရေးရာထူး စတင်ရရှိ၍ အခွင့်အရေးများသဖြင့် အလုပ်အပေါ် တန်ဖိုးထားရမည် ဖြစ်ပါကြောင်း၊  တိုင်းရင်းသား လူမျိုးပေါင်း (၁၃၅) မျိုးရှိ၍ မတူကွဲပြားမှုများ ရှိပါကြောင်း၊ ပြည်ထောင်စုစိတ်ဓါတ်သည် အဓိက ဖြစ်ပါကြောင်း၊ မိမိတို့နိုင်ငံသည် အခြေခံကောင်းများ ရှိနေသည်ဖြစ်ပါကြောင်း၊ လူ့စွမ်းအား အရင်းအမြစ်အတွက် လူငယ်များသည် အရေးကြီးပါကြောင်း၊ လူငယ်များ၏စွမ်းအားဖြင့် တိုင်းပြည်၏အနာဂတ် ဖွံ့ဖြိုးတိုးတက်အောင် စွမ်းဆောင်မှုသည် အရေးကြီးပါသဖြင့် နိုင်ငံတော်အပေါ် သစ္စာစောင့်သိရမည်ဖြစ်ပြီး ကျေးဇူးမမေ့သင့်ပါကြောင်း၊ ဝန်ထမ်းဖြစ်လာပြီဖြစ်သဖြင့် နိုင်ငံ့ဝန်ထမ်း ဥပဒေ/ နည်းဥပဒေများ၊ ဝန်ထမ်းကျင့်ဝတ်များနှင့်အညီ အမှားအမှန်အား စဉ်းစားချင့်ချိန် ဆောင်ရွက်ရမည်ဖြစ်ပါကြောင်း၊ သက်ဆိုင်ရာကဏ္ဍအလိုက် တာဝန်ကျေစွာ ဆောင်ရွက်ရန် လိုပါကြောင်း၊ မိမိဆောင်ရွက်သည့်လုပ်ငန်းအား စည်းကမ်းရှိရှိ၊ လေးလေးစားစား ဆောင်ရွက်ရန် လိုအပ်ပါကြောင်း၊ လူငယ်များအောင်မြင်တိုးတက် စေချင်ပါကြောင်း ပြောကြားပါသည်။

          ဒုတိယဝန်ကြီး ဦးအောင်ထွန်းခိုင်က အမှာစကားပြောကြားရာတွင် ကျောင်းဆင်း ကျောင်းသား/ သူများအနေဖြင့် ပညာအခြေခံရှိပြီး ဖြစ်ပါကြောင်း၊ ဝန်ကြီးဌာနအနေဖြင့် လူသားချင်းစာနာ ထောက်ထားမှု၊ ကူညီကယ်ဆယ်ရေးလုပ်ငန်းများ၊ ပြုစုစောင့်ရှောက်ရေး လုပ်ငန်းများ၊ ဘေးအမျိုးမျိုး အတွက် ကူညီထောက်ပံ့ရေးလုပ်ငန်းများ ဆောင်ရွက်နေပါကြောင်း၊ ဝန်ကြီးဌာန၏လုပ်ငန်းများအား သေချာသိပါက များစွာဂုဏ်ယူဖို့ကောင်းပါကြောင်း၊ ဝန်ထမ်းဖြစ်လာပါက ဝန်ထမ်းကျင့်ဝတ်ရှိရန် လိုပါကြောင်း၊ လေ့လာရမည်ဖြစ်ပါကြောင်း၊ မိမိအဆင့်နှင့်အညီလုပ်ဆောင်ရမည် ဖြစ်ပါကြောင်း၊ အဆင့်အလိုက် အလုပ်တာဝန်များအား ခိုင်း၍လုပ်သည်မဟုတ်ဘဲ အလုပ်အပေါ် စေတနာထား၍ လုပ်စေလိုပါကြောင်း၊ Emotion ကိုထိန်းနိုင်ရမည် ဖြစ်ပါကြောင်း၊ ရည်မှန်းချက်ထား၍ တိုးတက်အောင် ဆောင်ရွက်ရမည် ဖြစ်ပါကြောင်း၊ ခေါင်းဆောင်ကောင်းများဖြစ်အောင် ဆောင်ရွက် ရမည်ဖြစ်ပါကြောင်း၊ ကမ္ဘာ့နိုင်ငံများနှင့် မိမိနိုင်ငံအတွင်း ဖြစ်ပေါ်နေသည်များအား ဆင်ခြင်တုံ တရားဖြင့် စဉ်းစားဆောင်ရွက်ကြစေလိုပါကြောင်း ပြောကြားခဲ့ကြောင်းသတင်းရရှိပါသည်၊၊