လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး၊ ဒေါက်တာသက်သက်ခိုင်၊ ဒုတိယဝန်ကြီး ဦးအောင်ထွန်းခိုင်နှင့် တာဝန်ရှိသူများသည် ရန်ကုန်တိုင်းဒေသကြီး လူမှုရေးဝန်ကြီး လိုက်ပါလျက် မရမ်းကုန်းမြို့နယ်ရှိ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ဗဟိုသိုလှောင်ရုံ (ရန်ကုန်မြို့) သို့ရောက်ရှိကြပြီး အိန္ဒိယနိုင်ငံအစိုးရမှ မြန်မာနိုင်ငံသို့လှူဒါန်းသည့် ဆန်နှင့်ဂျုံများအား MIP နှင့် Asia World ဆိပ်ကမ်းများမှ ကွန်တိန်နာများဖြင့် ရောက်ရှိလာသော ဆန်အိတ်များအား သိုလှောင်ရုံအတွင်း သိုလှောင်ထားရှိမှုနှင့် မြို့နယ်များသို့ ဖြန့်ဝေပို့ဆောင်ရန် စီစဉ်ဆောင်ရွက်ထားရှိမှု  အခြေအနေများအား ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ရန်ကုန်တိုင်းဒေသကြီးဦးစီးမှူးက ရှင်းလင်းတင်ပြခဲ့ရာ လိုအပ်ချက်များအား ပေါင်းစပ်ညှိနှိုင်းဆောင်ရွက်ပေးခဲ့ပြီး သိုလှောင်ရုံအတွင်း ဆောင်ရွက်နေမှုအခြေအနေများအား ကြည့်ရှုစစ်ဆေးခဲ့ကြပါသည်။

     ဆက်လက်၍ မွန်းလွဲပိုင်းတွင် ပြည်ထောင်စုဝန်ကြီးနှင့်အဖွဲ့သည် တိုင်းဒေသကြီးလူမှုရေး  ဝန်ကြီးလိုက်ပါလျက် မရမ်းကုန်းမြို့နယ်ရှိ လူမှုဝန်ထမ်းဦးစီးဌာန မသန်စွမ်းသက်ငယ်သင်တန်းကျောင်းသို့ရောက်ရှိကြရာ တာဝန်ခံကျောင်းအုပ်က သင်တန်းကျောင်း၏ရည်ရွယ်ချက်နှင့် လုပ်ငန်းဆောင်ရွက်နေမှု အခြေအနေများအားရှင်းလင်းတင်ပြခဲ့ရာ ပြည်ထောင်စုဝန်ကြီးက သင်တန်းကျောင်းအနေဖြင့် ပိုမိုထိရောက်ကျယ်ပြန့်စွာ အကျိုးပြုနိုင်ရေးအတွက် မသန်စွမ်းသူများဖွံ့ဖြိုးတိုးတက်ရေးဆိုင်ရာ Resource Center အဖြစ် မြှင့်တင်၍ TOT သင်တန်းများပို့ချနိုင်ရေး ဆောင်ရွက်သွားရန် လမ်းညွှန်မှာကြားခဲ့ပါသည်။

     ဆက်လက်၍ ပြည်ထောင်စုဝန်ကြီးနှင့်အဖွဲ့သည် တိုင်းဒေသကြီး လူမှုရေးဝန်ကြီးလိုက်ပါလျက် မရမ်းကုန်းမြို့နယ်ရှိ လူမှုဝန်ထမ်းဦးစီးဌာန မသန်စွမ်းကလေးများပြုစုစောင့်ရှောက်ရေး ဂေဟာသို့ရောက်ရှိကြပြီး မသန်စွမ်းကလေးများအား ပြုစုစောင့်ရှောက်ပေးနေမှုအခြေအနေများနှင့် စားသောက်နေထိုင်မှုအခြေအနေများအား လှည့်လည်ကြည့်ရှုစစ်ဆေးခဲ့ကာ မသန်စွမ်းကလေးများအား ရင်းရင်းနှီးနှီးတွေ့ဆုံနှုတ်ဆက်အားပေးခဲ့ကြပါသည်။

     ဆက်လက်၍ ပြည်ထောင်စုဝန်ကြီးနှင့်အဖွဲ့သည် တိုင်းဒေသကြီး လူမှုရေးဝန်ကြီးလိုက်ပါလျက် မရမ်းကုန်းမြို့နယ်ရှိ လူမှုဝန်ထမ်းဦးစီးဌာန လူမှုဝန်ထမ်းအတတ်သင်သိပ္ပံကျောင်းသို့ ရောက်ရှိကြပြီး သင်တန်းကျောင်းခန်းမဆောင်၊ ဝန်ထမ်းအိမ်ရာနှင့် သင်တန်းကျောင်းအတွင်း လှည့်လည်ကြည့်ရှုစစ်ဆေးခဲ့ကြပါသည်။

    ဆက်လက်၍ ပြည်ထောင်စုဝန်ကြီးနှင့်အဖွဲ့သည် တိုင်းဒေသကြီး လူမှုရေးဝန်ကြီးလိုက်ပါလျက် မရမ်းကုန်းမြို့နယ်ရှိ လူမှုဝန်ထမ်းဦးစီးဌာန ကျိုက်ဝိုင်းလူငယ်သင်တန်းကျောင်းသို့ ရောက်ရှိကြရာ တာဝန်ခံကျောင်းအုပ်က ကျောင်း၏တည်နေရာ၊ အဆောက်အဦ၊ ဝန်ထမ်းအင်အား၊ ဝင်ဆံ့အင်အားနှင့် လက်ခံစောင့်ရှောက်ထားရှိမှု၊ ကလေးများ အသိပညာအတတ်ပညာဖွံ့ဖြိုးစေရေး ဆောင်ရွက်နေမှုအခြေအနေများ၊ အားသာချက်၊ အားနည်းချက်များနှင့် ဖြည့်ဆည်းဆောင်ရွက် ပေးစေလိုသည့်အချက်များအား ရှင်းလင်းတင်ပြခဲ့ရာ ပြည်ထောင်စုဝန်ကြီးနှင့် တာဝန်ရှိသူများက လိုအပ်သည်များလမ်းညွှန်မှာကြားခဲ့ပြီး သင်တန်းကျောင်းအိပ်ဆောင်များအတွင်း လိုက်လံကြည့်ရှုကာ ကလေးငယ်များအား လိမ္မာရေးခြားရှိပြီး အကျိုးပြုနိုင်သော လူ့စွမ်းအားအရင်းအမြစ်များဖြစ်လာစေရေးအတွက် ကြိုးစားဆောင်ရွက်ကြရန် တိုက်တွန်းအားပေးပြောကြားခဲ့ကြောင်း သတင်းရရှိပါသည်။