လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာနလက်အောက်ရှိ နားမကြားသောကလေးများကျောင်း (မန္တလေး) တွင် ဖွင့်လှစ်ပို့ချမည့် မြန်မာစံလက်သင်္ကေတပြဘာသာစကားကူညီပံ့ပိုးသူမွမ်းမံသင်တန်း ဖွင့်ပွဲအခမ်းအနားကို ယနေ့ နံနက် (၁၀:၀၀) နာရီတွင် အဆိုပါဝန်ကြီးရုံး EC ခန်းမ၌ ကျင်းပခဲ့ရာ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်သက်ခိုင်၊ ဒုတိယဝန်ကြီး ဦးအောင်ထွန်းခိုင်၊ အမြဲတမ်းအတွင်းဝန်၊ ညွှန်ကြားရေးမှူးချုပ်၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များနှင့် တာဝန်ရှိသူများတက်ရောက်ခဲ့ပြီး သက်ဆိုင်ရာတိုင်းဒေသကြီးဦးစီးမှူးများ၊ မသန်စွမ်းသင်တန်းကျောင်းများမှကျောင်းအုပ်များ၊ သင်တန်းနည်းပြများ၊ သင်တန်းသား/ သူများက အွန်လိုင်းမှတဆင့် တက်ရောက်ခဲ့ကြပါသည်။

    ရှေးဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် ၂၀၁၉ခုနှစ်၊ ကြားဖြတ်သန်းခေါင်စာရင်းအရ မြန်မာနိုင်ငံလူဦးရေ၏ (၁၂.၈) ရာခိုင်နှုန်းဖြစ်သော (၅.၉၆၈) သန်းသည် မသန် စွမ်းသူများဖြစ်ပါကြောင်း၊ ၎င်းတို့အနက် အကြားအာရုံပိုင်းဆိုင်ရာအခက်အခဲရှိသူ အရေအတွက်သည် (၁.၀၉၂) သန်းရှိပြီး  စုစုပေါင်းလူဦးရေ၏ (၂.၃၅) ရာခိုင်နှုန်း ဖြစ်ပါကြောင်း၊ အကြားအာရုံမသန် စွမ်းသူများ၏ အဓိကအခက်အခဲသည် အခြားသူများနှင့်ဆက်သွယ်ခြင်းနှင့် ၎င်းတို့အတွက်သီးခြားရှိနေသည့် ဘာသာစကားကိုလူ့အသိုက်အဝန်းအတွင်း သိရှိနားလည်မှုအားနည်းခြင်းတို့ဖြစ်ပါကြောင်း၊ ၎င်းအခက်အခဲကို ဥပဒေအရအကာအကွယ်ပေးနိုင်ရန်အတွက်  မသန်စွမ်းသူများ၏ အခွင့်အရေးဥပဒေ (၂၀၁၅)၊  အခန်း (၁)၊ ပုဒ်မ (၂)၊ ပုဒ်မခွဲ (စ) တွင် “ဆက်သွယ်ခြင်း” ၏အဓိပ္ပါယ်ကို  ဖော်ပြထားသကဲ့သို့ ပုဒ်မ (၂)၊ ပုဒ်မခွဲ (ဆ) တွင်လည်း “ဘာသာစကား” ၏ အဓိပ္ပါယ်ရှင်းလင်းချက်ကို ပြဌာန်းထားပါကြောင်း၊ မိမိတို့ဝန်ကြီးဌာနအနေဖြင့် မသန်စွမ်းသူများ၏အခွင့်အရေးဥပဒေနှင့် နည်းဥပဒေများ မပြဌာန်းမီကထဲက  ရပ်ရွာအတွင်းရှိ အကြားအာရုံချို့ယွင်းအားနည်းသူများအတွက် အများနည်းတူလူမှုအသိုက်အဝန်းအတွင်း ပိုမိုဝင်ဆံ့နိုင်ရေးနှင့် သတင်းအချက်အလက် ပိုမိုရရှိနိုင်ရေး ရည်ရွယ်ပြီး လူမှုဝန်ထမ်းဦးစီးဌာနနှင့် Japan International Cooperation Agency (JICA) တို့  ပူးပေါင်းပြီး ၂၀၀၇ ခုနှစ်ဒီဇင်ဘာလမှ ၂၀၁၀ ခုနှစ် ဒီဇင်ဘာလအထိ စီမံကိန်းပထမအဆင့်ကိုလည်းကောင်း၊ ၂၀၁၁ ခုနှစ် ဩဂုတ်လမှ ၂၀၁၄ ခုနှစ် ဩဂုတ်လအထိ စီမံကိန်းဒုတိယအဆင့်ကိုဆောင်ရွက်ခဲ့ရာ သင်တန်းနည်းပြဆရာ/ ဆရာမ (၉) ဦးကို မွေးထုတ်ပေးနိုင်ခဲ့ပါကြောင်း၊ ထို့နောက် နားမကြားသောကလေးများကျောင်း (ရန်ကုန်) တွင် ၂၀၁၃ ခုနှစ်၊ ဒီဇင်ဘာလမှ ၂၀၁၉ ခုနှစ်၊ ဩဂုတ်လအထိ  သင်တန်းကာလ (၁၈) လ ကြာမြင့်သည့် လက်သင်္ကေတပြဘာသာစကားကူညီပံ့ပိုးသူသင်တန်း အမှတ်စဉ် (၁) မှ (၄) အထိ ဖွင့်လှစ်နိုင်ခဲ့ပြီး သင်တန်းသား/သူ စုစုပေါင်း (၇၉) ဦး မွေးထုတ်ပေးနိုင်ခဲ့ပါကြောင်း၊ သင်တန်း၏ အကျိုးဆက်အနေဖြင့်  “လက်သင်္ကေတပြဘာသာစကားဝန်ဆောင်မှုပေးရာဌာန” ကို ရန်ကုန် မြို့နှင့် မန္တလေးမြို့ရှိ မိမိတို့ဌာန၏ နားမကြားသောကလေးများကျောင်းများတွင် ဖွင့်လှစ်နိုင်ခဲ့ပြီး အကြားအာရုံမသန်စွမ်းသူများအတွက်ဆေးရုံ၊ ဆေးခန်းသွားခြင်း၊ အလုပ်အင်တာဗျူးဖြေဆိုခြင်း၊ အစည်းအဝေး၊ အလုပ်ရုံဆွေးနွေးပွဲနှင့်အခမ်းအနားများတွင် တက်ရောက်ဆွေးနွေးခြင်း၊ တရားရုံးများနှင့်ရဲစခန်းများမှ အကူအညီတောင်းခံလာသော ကိစ္စရပ်များတွင် ကူညီခြင်းအစရှိသည့်လိုအပ်သော နေရာများတွင် လက်သင်္ကေတပြဘာသာစကားဝန်ဆောင်မှုပေးလျက်ရှိပါကြောင်း၊ အဆိုပါ လက်သင်္ကေတပြဘာသာစကားကူညီပံ့ပိုးသူသင်တန်းအမှတ်စဉ် (၁) မှ (၄) အထိဖွင့်လှစ်ခဲ့ရာ လူမှုဝန်ထမ်းဦးစီးဌာနမှ ဝန်ထမ်း (၄၄) ဦး မွေးထုတ်ပေးနိုင်ခဲ့ပြီး ယခုအခါ လက်သင်္ကေတပြဘာသာ စကားကူညီပံ့ပိုးသူ သင်တန်းဆင်းဝန်ထမ်းများသည် လက်သင်္ကေတပြဘာသာစကား အသုံးပြုမှုနည်းပါးခြင်းနှင့် ကျွမ်းကျင်မှုများ အားနည်းနေခြင်းကြောင့် ယခုကဲ့သို့ မြန်မာစံလက်သင်္ကေတပြ ဘာသာစကား ကူညီပံ့ပိုးသူမွမ်းမံသင်တန်း  Phase–I ကို  ဖွင့်လှစ်ပေးခြင်းဖြစ်ပါကြောင်း ပြောကြားခဲ့ပါသည်။ 

     ထို့နောက် ဒုတိယဝန်ကြီးက အမှာစကားပြောကြားရာတွင် လက်သင်္ကေတပြဘာသာစကား ကူညီပံ့ပိုးသူများအား တရားဝင်အသိအမှတ်ပြုနိုင်ရေး ဆောင်ရွက်သွားကြရမည် ဖြစ်ပါကြောင်း၊ လက်သင်္ကေတပြဘာသာစကားကူညီပံ့ပိုးသူများကို ထပ်မံမွေးထုတ်ပေးနိုင်ရေး၊ ရှေ့လုပ်ငန်းစဉ်အနေဖြင့် Service Provider Association ဖွဲ့စည်းရေးအတွက်လည်း လုပ်ဆောင်သွားရမည် ဖြစ်ပါကြောင်း ပြောကြားခဲ့ပြီး သင်တန်းနည်းပြဆရာ/ ဆရာမများနှင့် သင်တန်းသား/ သူများက တစ်ဦးချင်း မိတ်ဆက်ခဲ့ကြပါသည်။

     သင်တန်းကို (၄.၇.၂၀၂၂) ရက်နေ့မှ (၂၉.၇.၂၀၂၂) ရက်နေ့အထိ (၁) လတာ ဖွင့်လှစ်မည် ဖြစ်ပြီးသင်တန်းတွင်လက်သင်္ကေတပြဘာသာစကားကူညီပံ့ပိုးသူသင်တန်းဆင်း လူမှုဝန်ထမ်းဦးစီး ဌာနမှ ဝန်ထမ်း (၉) ဦးနှင့် မြန်မာ့အသံနှင့်ရုပ်မြင်သံကြား (နေပြည်တော်) မှ ဝန်ထမ်း (၂) ဦး၊ သင်တန်းသား/ သူ စုစုပေါင်း (၁၁) ဦး  ပါဝင်တက်ရောက်ကြမည်ဖြစ်ပါကြောင်း သတင်းရရှိပါသည်။