၂၀၂၂ ခုနှစ် ၊ မြန်မာအမျိုးသမီးများနေ့ အခမ်းအနားကို ယနေ့ နံနက်ပိုင်းက လွိုင်ကော်မြို့ ၊ မြို့နယ်ခန်းမ၌ ကျင်းပပြုလုပ်ခဲ့ရာ ကယားပြည်နယ် အစိုးရအဖွဲ့ ၊ ပြည်နယ်ဝန်ကြီးချုပ် ဦးဇော်မျိုးတင် ၊ ပြည်နယ်အစိုးရအဖွဲ့ဝင် ၊ ပြည်နယ်ဝန်ကြီးများ ၊ ဌာနဆိုင်ရာများ ၊ လူမှုရေးရာအသင်းအဖွဲ့များနှင့် ရပ်မိ၊ ရပ်ဖများ တက်ရောက်ခဲ့ကြသည်။

     ရှေးဦးစွာ ပြည်နယ်ဝန်ကြီးချုပ် ဦးဇော်မျိုးတင်က အမျိုးသမီးများ၏ အခန်းကဏ္ဍဖွံ့ဖြိုးတိုးတက်ရေး ၊ စွမ်းဆောင်ရည်မြင့်မားရေးနှင့် အကာအကွယ်ပေးရေးဆိုင်ရာလုပ်ငန်းများ အရှိန်အဟုန်မပြတ်ဆောင်ရွက်နိုင်ရေးအတွက် နိုင်ငံတော်မှမူဝါဒ (၄) ရပ်ချမှတ်ပြီး အကောင်အထည်ဖော်ဆောင်ရွက်ပေးနေမှုများ ၊ အမျိုးသမီးများဘဝမြင့်တင်ရေးအတွက် ကဏ္ဍအသီးသီးတွင် ဆောင်ရွက်နေသောလုပ်ငန်းများ၏အရေးကြီးမှုကို ပြည်သူလူထုက သိရှိနားလည်ပြီး သက်ဆိုင်ရာဌာနဆိုင်ရာများ၊ ရပ်ရွာလူထုခေါင်းဆောင်များ၊ ဘာသာရေးခေါင်းဆောင်များ၊ လူမှုရေးအသင်းအဖွဲ့များနှင့် ရပ်မိရပ်ဖများပူးပေါင်းပါဝင်ဆောင်ရွက်သွားရန်လိုအပ်ကြောင်း အဖွင့်အမှာစကားပြောကြားခဲ့သည်။

     ဆက်လက်၍ လွိုင်ကော်မူလတန်းကြိုကျောင်း ရင်သွေးငယ်လေးများမှ “ထာဝရ သစ္စာ” သီချင်းဖြင့် ကပြဖျော်ဖြေခဲ့ကြပြီး ပြည်နယ်ဝန်ကြီးချုပ်က ကပြဖျော်ဖြေခဲ့ကြသော ရင်သွေးငယ်လေးများအား အမှတ်တရ လက်ဆောင်ပစ္စည်းများ ပေးအပ်ခဲ့သည်။

     ဆက်လက်ပြီး ၂၀၂၂ ခုနှစ် ၊ မြန်မာအမျိုးသမီးများနေ့ အထိမ်းအမှတ်အဖြစ် ကျင်းပပြုလုပ်သော ပန်းအလှထိုးပြိုင်ပွဲနှင့် အချက်အပြုတ်ပြိုင်ပွဲတွင် ဆုရရှိသူများအား ပြည်နယ်ဝန်ကြီးချုပ်နှင့် လုံခြုံရေးနှင့်နယ်စပ်ရေးရာ ဝန်ကြီးတို့က ဆုများအသီးသီးချီးမြှင့်ခဲ့ကြသည်။

     ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများက အမျိုးသမီးရေးရာအဖွဲ့ ၊ လူမှုရေးအသင်းအဖွဲ့နှင့် ရပ်မိ ၊ ရပ်ဖများအား ရင်းရင်းနှီးနှီးတွေ့ဆုံ နှုတ်ဆက်စကားပြောကြားခဲ့ကြောင်းသိရသည်။