၂၀၂၂ ခုနှစ်၊ အောက်တိုဘာလ (၁) ရက်နေ့တွင် ကျရောက်သည့် အပြည်ပြည်ဆိုင်ရာ သက်ကြီးရွယ်အိုများနေ့အထိမ်းအမှတ်အခမ်းအနားကို (၁.၁၀.၂၀၂၂) ရက်နေ့၊ မွန်းလွဲ (၁၃:၀၀) နာရီအချိန် မော်လမြိုင်မြို့၊ သာသနာ့ဗိမာန်တွင် ကျင်းပပြုလုပ်ခဲ့ပါသည်။ အခမ်းအနားတွင် မွန်ပြည်နယ်အစိုးရအဖွဲ့ လူမှုရေးရာဝန်ကြီး ဦးမြတ်သွင်က အဖွင့်အမှာစကားပြောကြားပြီး၊ အခမ်းအနားသို့ တက်ရောက်လာသော တောင်ဝိုင်းဘိုးဘွားရိပ်သာမှ ဘိုး၊ ဘွား (၂၀) ဦးအား ကန်တော့ချိုးဖြင့် ရှိခိုးကန်တော့ကြပါသည်။ ထို့နောက် ဘိုးဘွားများအား ဂုဏ်ပြုဂါရဝငွေ ကျပ် ၅၀၀၀ဝိ/-၊ ပြည်နယ်ပြည်သူ့ကျန်းမာရေးဦးစီးဌာနမှ လှူဒါန်းသည့် ကျပ် ၅၀၀၀ဝိ/- တန်ဖိုးရှိ ဆေးဝါးများပါ ပုံး (၁) ပုံး၊ ပြည်နယ်ကြက်ခြေနီကြီးကြပ်မှုကော်မတီမှ လှူဒါန်းသည့် လုံချည်၊ ထမီ (၁) ထည်စီ၊ ပြည်နယ်အမျိုးသမီးရေးရာအဖွဲ့နှင့် ပြည်နယ်မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့တို့မှလှူဒါန်းသည့် ခြုံစောင် (၁) ထည်စီနှင့် ကွေကာအုပ် (၁) ထုပ်စီတို့ကို တက်ရောက်လာသော ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝန်ကြီးများ၊ ဌာနဆိုင်ရာတာဝန်ရှိသူများက လှူဒါန်းခဲ့ကြပြီး၊ အဘိုး(၁) ဦးနှင့်အဘွား (၁) ဦးက ဆုတောင်းမေတ္တာပြန်လည်ပို့သကာ အခမ်းအနားကို မွန်းလွဲ (၁၃:၃၀) နာရီတွင် ရုပ်သိမ်းလိုက်ပါသည်။ အခမ်းအနားတွင် မွန်ပြည်နယ်အတွင်းရှိ ကန်တော့ခံဘိုးဘွား (၁၈၉) ဦးအတွက် မွန်ပြည်နယ်အစိုးရအဖွဲ့နှင့် ပြည်နယ်ပြည်သူ့ကျန်းမာရေးဦးစီးဌာန၊ ပြည်နယ်ကြက်ခြေနီကြီးကြပ်မှုကော်မတီတို့မှ ငွေသားနှင့်ပစ္စည်းတန်ဖိုးကျပ် ၁၄၂,၀၈,၀၀ဝိ/-(ကျပ်တစ်ရာလေးဆယ့်နှစ်သိန်းရှစ်ထောင်တိတိ) ကိုလှူဒါန်းခဲ့ပါကြောင်းနှင့် အခမ်းအနားသို့ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင်ဝန်ကြီးများနှင့်ဇနီးများ၊ ပြည်နယ်ဥပဒေချုပ်၊ ပြည်နယ်/ ခရိုင်/ မြို့နယ်အဆင့် ဌာနဆိုင်ရာအကြီးအကဲများ စုစုပေါင်း အင်အား (၇၀) ဦးခန့် တက်ရောက်ခဲ့ပါသည်။